Lamba Suicide: દેવભૂમિ દ્વારકા જિલ્લાના કલ્યાણપુર તાલુકાના લાંબા ગામે સોમવારે, 6 ઓક્ટોબરના રોજ સાંજે એક હૃદયદ્રાવક ઘટના સામે આવી છે. મોઢાના કેન્સરની અંતિમ અવસ્થાથી પીડિત 40 વર્ષીય યુવાન પિતાએ પોતાના બે માસૂમ સંતાનોને ઝેરી દવા પીવડાવી અને બાદમાં પોતે પણ જીવ ટૂંકાવી લીધો. પિતાએ સંતાનોના ભવિષ્યની ચિંતામાં આવીને આ કરુણ પગલું ભર્યું હોવાનું પોલીસની પ્રાથમિક તપાસમાં બહાર આવ્યું છે.
આ ત્રણ મૃત્યુથી આખા લાંબા ગામ અને સમગ્ર કલ્યાણપુર પંથકમાં શોકનો માહોલ છવાઈ ગયો છે.
કરુણ ઘટનામાં પરિવારના ત્રણ સભ્યોના મોત
ઘટનામાં મૃત્યુ પામેલા ત્રણ સભ્યોની ઓળખ નીચે મુજબ છે:
- મેરામણ કરશન ચેતરિયા (ઉંમર 40, પિતા)
- ખુશી મેરામણ ચેતરિયા (ઉંમર 5, પુત્રી)
- માધવ મેરામણ ચેતરિયા (ઉંમર 3, પુત્ર)
સ્થાનિક સૂત્રોના જણાવ્યા અનુસાર, મેરામણભાઈ તેમના બાળકોને ખૂબ પ્રેમ કરતા હતા, પરંતુ છેલ્લા ઘણા સમયથી તેમની ગંભીર બીમારીને કારણે તેઓ માનસિક તાણમાં હતા. તેમની આસપાસના લોકોએ જણાવ્યું કે તેઓ વારંવાર એક જ વાતની ચિંતા વ્યક્ત કરતા: “મારા મૃત્યુ પછી મારા નાના બાળકોનું શું થશે?”
કેન્સરની અંતિમ સ્ટેજ અને લાચારી
મળતી માહિતી મુજબ, મેરામણભાઈ છેલ્લા પાંચ વર્ષથી મોઢાના કેન્સરથી પીડાઈ રહ્યા હતા. છેલ્લા કેટલાક મહિનાઓમાં તેમની તબિયત એટલી બગડી ગઈ હતી કે ડૉક્ટરોએ પણ તેમને અંતિમ સ્ટેજમાં હોવાનો સંકેત આપી દીધો હતો. શારીરિક પીડા અને સંતાનોના ભવિષ્યની ચિંતા વચ્ચે લાચાર બનીને ગઈકાલે સાંજે તેમણે આ અંતિમ અને કરુણ નિર્ણય લીધો હતો.
આર્થિક તંગી કે અન્ય કોઈ કારણ છે કે કેમ તે અંગેની તપાસ પણ પોલીસે હાથ ધરી છે.
પોલીસની કાર્યવાહી અને હત્યા-આત્મહત્યાનો ગુનો
ઘટનાની જાણ થતાં જ દ્વારકા સર્કલ DySP સાગર રાઠોડ અને તેમની ટીમ તાત્કાલિક લાંબા ગામે પહોંચી હતી. પોલીસે ઘટનાસ્થળની ઝીણવટભરી તપાસ કરી અને FSL (ફોરેન્સિક સાયન્સ લેબોરેટરી) ટીમની મદદ લઈને પુરાવા એકત્ર કર્યા હતા.
મૃતક મેરામણભાઈના સગા પબાભાઈ સામતભાઈ ચેતરિયા દ્વારા આ અંગે ફરિયાદ નોંધાવવામાં આવી છે. ફરિયાદના આધારે કલ્યાણપુર પોલીસ સ્ટેશનમાં હત્યા અને આત્મહત્યાનો ગુનો નોંધીને P.I. ટી.સી. પટેલ દ્વારા આ સમગ્ર મામલે વધુ તપાસ શરૂ કરવામાં આવી છે.
માનસિક સ્વાસ્થ્ય અંગે ગંભીર સવાલ
આ કરુણ ઘટના સમાજમાં માનસિક સ્વાસ્થ્ય અને ગંભીર બીમારીઓનો સામનો કરી રહેલા લોકોની પરિસ્થિતિ અંગે ગંભીર સવાલો ઊભા કરે છે. આ એકલદોકલ બનાવ નથી. અંદાજે એક વર્ષ પહેલાં દ્વારકાના ધારાગઢ ગામે પણ આહીર પરિવારના ચાર સભ્યોએ રેલવે ફાટક પાસે ઝેરી દવા પીને આપઘાત કર્યો હતો.
આ પ્રકારના બનાવો દર્શાવે છે કે, મુશ્કેલ પરિસ્થિતિઓમાં શારીરિક મદદની સાથેસાથે માનસિક સહારો અને કાઉન્સેલિંગ માળખું પણ અત્યંત જરૂરી છે.